Effe serieus

Ich waerdje gevraog om get euver mich zelf op te sjrieve veur op de Limburgse Wikipedia. In ’t plat. 

Es se op de Wikipedia moogs, is det naturlik ’n groeate ieër en dao zaes se neet nae taenge. Toch haw ich baeter effe get langer kinne naodinke. 

Want mien plat is gein zuver Mofers mieër. Det is schmutzig* gewaore, dao is get van dit en get van det door haer gegreujtj en det kump doordet ich ouch mit luuj kal die neet oet Mofert zeen. En waat mesjiens nag erger is, d’r zitte soms Hollanse dinger in mien plat. (En det kump doordet ich beuk sjrief veur ’ne Hollanse oetgaeverie).

Twieëdje probleem is det mien spelling neet hóngerd procent* foutloos is. Ich volg de spellingregels van Veldeke van 2003 zoea good es ich kin, mer die Limburgse spelling zitj lang neet zoea vas in miene kop es de Hollanse spelling. Dao maak ich waal ’ns foute taenge. (Mer dan zèk ich taenge mich zelf: ‘Waat se sjriefs is toch belangrieker dan wiese ’t sjriefs, neet dan?’)

Wie ich mie stökske vaerdig haw, waas ich d’r bès content euver. ’t Waas ’n net rieke titels gewore, aortilik op categorie* en daobinne chronologisch* gesorteerdj.

Mer doe kreeg ich van emes dae hieël good en hieël väöl en ouch hieël aad Mofers kintj, ’n deil roeaj strepe drin. (Nae neet Pierre Bakkes). Op zich neet erg. Waat fout is, is fout, mer dit ging neet euver de blome, mer euver de wortele van de taal en zoea deep kin (en wil) ich neet grave.

Waem wiltj, kan ’t hie laeze. De feite kloppe.

*Volges de spellingregels van 2003 van Veldeke mósse lieënwäörd, sjrieve wie ze zeen, neet kompjoeter, mer computer, neet meel mer mail. Mer dan weit ich soms neet presies (of precies?) of ‘t e lieënwaord is. Is bureau nag e lieënwaord, of is det noe gewuuen buro? En is ‘t cadeaukado, of kedo? Categorie of kattegorie? Chronologisch of chronologies?